na-reject ang comics script kong ito, haha tuwang-tuwa pa naman ako kasi tungkol sa octopus. naisip ko, recently, na nakakatuwang gawing character ang octopus kasi parang bagay siya sa panahon natin, ang presence ng galamay ay simbolo ng pagmu-multitask ng karamihan sa atin.
(gusto kong magsulat ng children's story about solo parents at ang mga tauhan ay octopus.)
anyway, ang comics script na ito ay ibinatay ko sa parable of the tenants mula sa bibliya. iyon kasi ang in-assign sa akin na bible reading. medyo nahirapan din ako dito kasi palagay ko lalabas na masama ang landlord. kasi siyempre, landlord siya. i mean, napakapiyudal at kapitalista ng nature ng parable hahaha at pagka medyo diskumpiyado ako sa nakukuha kong mensahe mula sa isang bible reading, ang ginagawa ko ay ipina-pattern ko ang comics script ko sa mismong bible reading, in this case, isang parable. para safe, haha!
ang problema, ang una kong isinumite para sa isa pang bible reading (tungkol naman sa parable of the talents) ay kamukha rin nito. halos pareho ng plot. pero panda naman ang mga tauhan ko doon sa parable of the talents.
so na-reject itong tungkol sa mga octopus.
buti na rin at na-reject dahil nang basahin ko ito uli, iyong ending ko pala ay parang nagsa-suggest na magkakaroon ng away dahil lang sa anak ng may-ari ng ice cream shop. ang may ari ng ice cream shop ay simbolo ni jesus. so parang ang ending ko ay nagsa-suggest na mag-aaway-away ang mga tao dahil sa relihiyon :(
anyway, id like to share it here. enjoy!
Isang Araw, Sa Ocean’s 12 Ice Cream Shop
ni Beverly W. Siy
MGA TAUHAN: Iba’t ibang size ng octopus
Toto- pinakamaliit na octopus
Mga kasamahan sa Ocean’s 12 Ice Cream Shop-malalaki, matatabang octopus
Dencio Ocean-may ari ng Ocean’s 12 Ice Cream Shop
Andy Ocean- anak ni Dencio
Dalawang karaniwang octopus bilang mga kolektor ni Dencio
Mga kamag-anak ni Toto, maliliit na octopus
SETTING: Modern times, sa isang urban na lugar sa ilalim ng dagat. May ice cream shop na malaki, kamukha ng isang restaurant at ang isine-serve ay puro ice cream lamang. Makulay ang loob ng ice cream shop na ito.
FRAME 1: Tinadyakan palabas ng mga taga-ice cream shop ang isang octopus. Buhol-buhol ang mga galamay ng octopus na sinipa kaya nahihirapan itong mag-swimming palayo. Ang octopus na ito ay ang ikalawang kolektor na ipinadala ni Dencio Ocean sa kanyang ice cream shop.
I-establish ang Ocean’s 12 Ice Cream Shop sa pamamagitan ng signage sa labas ng shop.
Makikita naman sa likod ng mga sigang octopus si Toto, saksi siya sa lahat ng nangyari.
CAPTION: Nasaksihan ni Toto ang ginawa ng kanyang mga kasama sa kolektor ni Dencio Ocean.
KASAMAHAN 1 (mayayabang ang itsura at pinagtatawanan ang kanilang pinalayas na octopus): ‘Wag ka nang babalik dito! Hahaha!
KASAMAHAN 2: Magtatanda na si Dencio Ocean. Hindi na ‘yan magpapadala uli ng kolektor!
FRAME 2: Hati sa dalawa ang frame na ito. Close up. Kausap ni Toto si Mang Dencio sa cellphone. Alalang-alala ang itsura ni Toto. Alalang-alala rin si Mang Dencio.
DENCIO (may hawak na cellphone): Ginawa nila iyon? Ipapadala ko ang anak kong si Andy para kausapin sila at para makolekta na ang renta sa ice cream shop.
TOTO (may hawak na telepono, landline): Naku, ‘wag po. Baka saktan lang po nila ang anak ninyo!
FRAME 3: Flashback, kamukha ng FRAME 1, tinadyakan palabas ng mga taga-ice cream shop ang isang octopus. Naka-duct tape ang bibig at mga galamay ng octopus na sinipa kaya nahihirapan itong mag-swimming palayo. Ang octopus na ito ay ang unang kolektor na ipinadala ni Dencio Ocean sa kanyang ice cream shop. I-establish ang Ocean’s 12 Ice Cream Shop sa pamamagitan ng signage sa labas ng shop. Makikita naman sa likod ng mga sigang octopus si Toto, saksi siya sa lahat ng nangyari.
CAPTION: Ikinuwento ni Toto ang nangyari sa unang kolektor na ipinadala ni Dencio Ocean.
LAHAT NG KASAMAHAN : (mayayabang ang itsura at pinagtatawanan ang kanilang pinalayas na octopus) TOTO (off frame, word balloon): Ginulpi at sinaktan po nila ang unang kolektor na inyong ipinadala.
FRAME 4: Hati sa dalawa ang frame na ito. Close up pareho. Kausap ni Toto si Mang Dencio sa cellphone. Close up ni Toto. Kitang kita ang takot sa mukha ni Toto. May hawak na cellphone si Mang Dencio, landline naman si Toto.
MANG DENCIO: Anak ko si Andy. Iyon ang huling pag-asa nila para maipadala sa akin ang inyong renta sa ice cream shop. Hindi nila sasaktan si Andy.
TOTO: Kahit po anak ninyo si Andy, hindi pa rin po sila makikinig, Mang Dencio.
FRAME 5: Nagswimming nang mabilis si Toto para kausapin ang mga kasamahan sa trabaho.
TOTO: Kailangang makumbinsi ko silang magbayad ng upa sa ice cream shop. Para hindi nila saktan si Andy. Kawawa naman, wala namang gagawing masama sa kanila ang anak ni Mang Dencio.
FRAME 6: Naabutan niyang nagtatrabaho ang kanyang mga kasamahan. Nagti-twirl sila ng ice cream sa bawat cone. Bawat galamay ng bawat octopus ay may hawak na ice cream na matatangkad. Mahaba ang pila ng mga gustong makabili ng ice cream. Itampok ang iba’t ibang hayop na pandagat: dugong, clown fish, sea anemone, pusit, sari-saring isda, sea horse, eel, manta ray, pawikan at iba pa.
CAPTION: Pilit na kinumbinsi ni Toto ang kanyang mga kasama.
KASAMA 1: Pag nagpadala pa siya ng kahit na sino rito, bubugbugin uli namin at tatadyakan palabas.
KASAMA 2: Lalo na kapag iyong anak niya ang ipinadala niya rito para mangolekta ng upa. Aba, iyon yata ang tagapagmana ng ice cream shop na ito.
KASAMA 3: Siyempre, pag wala nang tagapagmana, wala na ring kailangang kolektahin mula sa atin.
FRAME 7: Medium shot ni Toto.
CAPTION: Nangatwiran si Toto.
TOTO: Hindi atin ang ice cream shop na ‘to, umuupa lang tayo. Bakit bigla-bigla ay ayaw nating ibigay kung ano ang inaasahan mula sa atin? Kaya nga niya ipinadala sa atin ang anak niya dahil naniniwala si Mang Dencio na susunod pa rin tayo sa dating napagkasunduan. Naniniwala siyang hindi na tayo gagawa ng mali.
FRAME 8: Nagsalita ang pinakamalaking octopus.
CAPTION: Pero hindi pa rin pinakinggan si Toto ng kanyang mga kasamahan.
KASAMA 1: ‘Wag ka nang masatsat at makulit diyan. Tumulong ka na lang dito para may pakinabang ka!
TOTO (thought balloon): Gagawa na lang ako ng paraan para di mapahamak ang anak ni Mang Dencio!
FRAME 9: Payat ang frame na ito. Ipakita na may kausap sa cellphone si Toto. At alerto ang kanyang mga mata, patingin-tingin sa paligid.
FRAME 10: Mahaba-habang frame po ito.
Dumating na nga si Andy sa Ocean’s Twelve Ice Cream Shop. Nasa may pinto siya. Si Andy ay payat, mukhang geek, may black rimmed glasses, may bag siyang dala, iyong parang laptop bag at nakalabas na ang kanyang lapis at papel. Takang-taka siya sa itsura ng mga trabahador ng ice cream shop. Parang galit na galit ang mga ito sa kanya.
KASAMA 1: Aba, talagang makulit ang tatay mong si Dencio, ano?
KASAMA 2: Akala mo, may makukuha ka sa amin?
KASAMA 3: Wala! Bugbugin na ‘yan.
FRAME 11: Susulpot si Toto. Ipakita kung gaano kaliit ang octopus na si Toto.
CAPTION: Pumagitna si Toto.
TOTO: Mga kasama, si Andy ang huling pagkakataon para mapatawad tayo ni Mang Dencio. Pati na ng mga kolektor na binugbog ninyo. Igalang natin si Andy. Siya ang magiging tulay natin para lalo pang gumanda ang relasyon natin kay Mang Dencio.
KASAMA 1: Anong kadramahan iyang sinasabi mo, Toto? Tumabi ka nga riyan!
FRAME 12: Lalabas ang lahat ng kapamilya at kamag-anak ni Toto. Gigitna sila at poproteksiyunan si Andy. Kaharap ng maliliit na octopus ang tatlong malalaking octopus. Lahat ng maliit na octopus, may dalang duct tape. Ipakita kung gaano kadeterminado si Toto.
CAPTION: Nagsisulputan ang mga kamag-anak ni Toto.
TOTO: Puwes, hindi ako papayag sa gusto ninyo. Walang ginagawang masama si Mang Dencio. At lalo na si Andy.
Wakas.
No comments:
Post a Comment