Rebyu para sa pelikulang Godzilla - 3 stars

Pros

Napakaganda ng sound. Sana manalo ito ng award dahil talagang pinerfect ang bawat elemento ng tunog sa pelikulang ito.

Guwapo ang bidang lalaki. Marunong din siyang umarte.

Andito ang Pilipinas! Wah! Pero ang sinasabi nito, dito sa atin galing ang isa sa mga halimaw, hahaha. Sa isang minahan daw sa Mindanao! (Minsan na lang tayo masali sa Hollywood film, kanlungan pa ng halimaw ang peg? Nge. Anyway, baka iyong senado at kongreso ang pinagbabatayan nila ng research. Oo nga naman. Sagana sa halimaw ang dalawang sangay na iyan ng pamahalaan.)

Cons

Parang robot ang acting ng tatay. Nakukulangan ako.

Nakatulog ako sa gitna ng pelikula. I’m sorry. Sadya talagang hindi ako na-hook sa premise ng pelikula.

Premise: May mag-asawang scientist na nagtatrabaho sa isang planta sa Japan. Si Papa Joe Brody at si Mama Sandra Brody. May isa silang anak. Si Baby Ford Brody. Ilang linggo nang naoobserbahan ni Papa Joe ang paggalaw ng lupa sa kanyang workplace. Patindi ito nang patindi. Matagal na niyang ini-report ito sa mas nakakataas sa kanya. Pero hindi siya pinapansin ng mga ito. walang ginawang anumang hakbang. Isang araw, birthday pa naman niya ito, napasugod siya sa planta. Kasama niya si Mama Sandra na papasok din sa trabaho nang araw na iyon. Iniwan nila si Ford, na naghanda pa naman ng surprise birthday banderitas para kay Papa Joe.

Tapos pagdating sa planta, pumunta na sa designated workplace niya si Mama Sandra. Sa ilalim ito ng lupa, sa isang parang network ng mga tubo. Si Papa Joe, gayundin. Pero ilang saglit lang, dumating ang nakakayanig na lindol. Walang tigil ito at napakalakas. Kumikindat-kindat na ang kuryente at nagkandasira-sira na ang mga aparato sa planta kaya nag-panic na ang mga tao. Takbuhan sila. nagkagulo na. si Mama Sandra, kasama ang buo niyang team ay naka-experience ng pagputok ng isang malaking tubo at nagdulot ito ng mala-daluyong, gray na gray na steam. Takbuhan sila pabalik sa entrada ng underground network na iyon ng mga tubo. Si Papa Joe, pababa na para puntahan at i-rescue si Mama Sandra kasi ila-lock na ang entrada, utos iyon ng mga boss niya. Ang kaso, nagkaaberya sina Mama Sandra noong malapit na sila sa entrada. Nadapa ang isang kasamahan niya kaya tinulungan pa niya ito at inakay hanggang sa entrada. Pagdating nila doon, saktong pasara na ang massive na pintuan. Nagkita pa sina Mama Sandra at Papa Joe pero hindi na silang magkakasama pang muli.

Naulila sa ina si Baby Ford.

After 15 years, sundalo na si Ford at may sarili na siyang pamilya sa USA. Nakatanggap siya ng tawag mula sa Japan. Nakulong daw ang tatay niya sa salang trespassing. Iyon palang area ng bahay nila, na malapit lang din sa planta, ay restricted area na dahil daw may radiation-radiation leak mula sa kung saan. In short, nakamamatay daw ang pumunta roon. Iyong tatay niya ay bumalik sa bahay nila para mag-retrieve ng ilang gamit. At nahuli nga ito ng awtoridad bago pa ito makalapit sa kanilang bahay.

So mula sa USA, pinuntahan ni Ford si Papa Joe sa Japan. At nalaman niya, iyong tatay niya ay hindi naka-move on sa sawimpalad na araw na iyon 15 years ago. Naniniwala ang tatay niyang hindi lindol ang nagdulot ng pagyanig ng lupa noon. Hinala nito, may itinatago ang kanilang planta. At iyon ang dahilan kung bakit namatay si Mama Sandra. Kaya kailangan itong matuklasan ng kanyang Papa Joe.

Sa loob ng tinutuluyan na bahay ng ama, nakita ni Ford ang iba’t ibang balita at articles tungkol sa mga pagyanig ng lupa at sa mga research na may kinalaman sa planta. Talaga palang sinusundan ito ng kanyang tatay. Sabi ng kanyang Papa Joe, tulungan mo akong ma-retrieve ang mga diskette sa bahay natin. Makakatulong iyon sa research ko. Pumayag naman si Ford kahit na inis na inis na siya sa di maka-move on niyang ama.

Pagdating nila sa lumang bahay (hindi sila nahuli sa pagpunta doon), natuklasan nilang walang radiation leak whatever. Malaya silang nakahinga kahit nang tanggalin nila ang suot na facial mask. Doon na nakumpirma ng dalawa na talagang may itinatago lang sa planta ang mga awtoridad. Nalaman din nila na operational pa hanggang ngayon ang planta. Dahil pagkaraan ng ilang minuto, nahuli sila at dinala sila sa planta para imbestigahan.

Sa planta, nang araw na iyon, mauulit ang matinding pagyanig ng lupa katulad ng nangyari 15 years ago. At matutuklasan ng mag-ama ang tunay na dahilan.

Sori ang haba ng premise ko, hehe.

Sa pagpapatuloy ng cons…

Nagulat ako na marami palang higanteng halimaw sa pelikula. Akala ko, si Godzilla lang. Kaya nang una akong makakita ng halimaw sa pelikula, akala ko si Godzilla na iyon. E, hindi naman kamukha ni Godzilla. So, parang na-disappoint na ako. Nang makita ko ang ikalawang halimaw, akala ko, talagang si Godzilla na iyon. Pero hindi siya kamukha ni Godzilla. So, akala ko, nag-evolve na si Godzilla at nag-iba na ang itsura niya. Pero hindi. Iba pa pala ang halimaw na iyon. So, medyo naiinis na ako. Kasi ang pumasok sa isip ko, akala ko ba, Godzilla ito? E, nasaan iyong bida? Antagal. Hahaha, natagalan ako sa paglabas niya. Kahihintay ko, nakatulog ako.

Medyo napagod din ang mata ko sa dami ng effects. Sadya lang yata na tumatanda ako. Hindi na ako sanay sa ratratan, sa action, at sa napakaraming nangyayari sa screen all at the same time. Pero siguro batay na rin ito sa type kong genre ng pelikula. Baka hindi na pang-sci-fi ang taste ko.

After naming manood (ako, tulog), tinanong ko si EJ kung nagandahan siya sa palabas. Sabi niya, okey lang. Sabi ko, nakatulog ako, ano ba ang nangyari? Sagot niya, saan ka ba nakatulog? Tapos nagkuwento na siya. HEP…HEP…SPOILERS ALERT… It turned out, tatlo ang halimaw. Si Godzilla ang naging hero kasi siya iyong pumuksa doon sa dalawang halimaw. Tapos naging hero si Ford dahil siya ang nakapagpasabog ng itlog ng isa sa mga halimaw. Hmm… I didn’t see that coming! Mukhang interesting naman pala ang plot.

Dudugtungan ko pa ang rebyu na ito. Panonoorin ko uli ang Godzilla. This time, ang kasama ko naman ay ang tunay na may ari ng title role na ito, si Poy.

27 May 2014
Kamias, Q.C.