merry christmas, tree!

matagal kong pinag-isipan kung ano ang ireregalo ko sa mga kaibigan ko sa faculty room. heto ang mga naisip ko:

libro (siyempre, filipino ang nagsulat)
medyas
pabango o cologne
pagkain
t-shirt

naisip ko ring huwag nang generic. kumbaga para sa bawat isa, iba ang regalo ko.

claire-shaker na mas maganda
g-cd ng shanghai trip pics
paguts-cd ng banda
mam cora-panty uli

kaya lang, naisip ko na gusto ko ay iyon namang kakaiba. iyong tipong hindi pa nila natatanggap ever.

doon pumasok sa isip ko ang isang imbensiyon ni wenni: scratch paper note book.

a month ago, pinagupit ko kay ate aileen ang mga scratch paper sa bahay: lumang memo, lumang exam, lumang silabus, lumang report, lumang sanaysay at iba pang lumang papel na malinis ang likod. abot yata sa baiwang ko ang mga scratch paper na nagupit. dahil baduy naman kung pabubutasan ko na lang uli kay ate aileen (gaya ng ginagawa namin para magkaroon ako ng notebook pang-MA), naisip kong gayahin ang idea ni wennie na ipa-ring bind ang mga ito.

pinagkompayl ko si ate ng tigpipitumpung pahina. pinagupit ko rin ang luma kong mga seat plan na gawa sa matigas-tigas na papel. ito ang front at back cover ng eco-friendly kong panregalong proyekto.

nakakita ako sa CR ng mga babae sa faculty room ng mga lumang report/research paper ng mga bata. may mga spring-spring iyon. iyong spring na ginagamit sa pagbabind ng soft bound na libro. iyong kulay itim.

sabi ni ate ditas (suki ko sa xerox-an), hinihila lang daw iyon at puwede nang gamitin uli. kaya iyon nga ang ginawa ko. tapos dinala ko na ang mga "regalo" sa RS xerox and binding stall sa likod ng eskuwela.

natuwa sa akin si manang na nagbabantay doon. sayang nga naman daw ang mga papel. sa sobrang tuwa niya ay pina-cut pa niya nang libre ang mga papel para magpantay-pantay ang mga ito. naging maganda tuloy ang notebook kahit bunton na lumang seat plan at scratch paper lang ang mga iyon.

tapos sinulatan ko ang front page ng:

pagpaskuhin natin ang mga puno!

at nilagyan ng heart at pangalan ko at DEC 09

sa front cover ay ang pangalan ng aking reregaluhan. pero may twist. heto:

car
rain
bald
daze

core
rush
zone
wreck
cat
show

joe
deal
lean
are
zen
yo

merge
jean
yeah
are
say
hue

row
annulled
pa
gothic

birdie
none
bone
them
hey

la
weigh
you
shall

cool
layer
what
show

unto
one
net
rose
say
tea

far
runs
says
kiss
sad
uh

far
runs
court
ace

heart
tour
row
pat
thong
an

ibinalot ko ang notebook sa diyaryo at nilagyan ng tag (na pinaxerox ko lang para hindi na ako bibili).

ang bati ng tag:

molly
guy
young
pass
cause
sigh
you.

bago ko ibinigay sa kanila ang mga regalo ko, pinasabik ko pa sila. sabi ko:

mamya ko na ibibigay ang gift ko sa inyo, ha? pinagawa ko pa. kasi hindi ito nabibili sa anumang tindahan. talagang personalized.

hehehehe. akala siguro nila kung ano.

mga pito sa kanila ay sabay-sabay na nagbukas ng regalo nang ibigay ko na ang mga ito. tawa naman sila nang tawa.

tawa rin ako nang tawa. mantakin mo, nakatipid ka na, nakapagpasaya ka pa. at hindi lang iyon, nakatulong ka pa kay mother earth.

merry christmas, tree!